चराले गर्दा एक मात्र अन्तर्राष्ट्रि विमानस्थल बन्द

कार्तिक ११ - चराको भीड लागेकाले आइतबार त्रिभुवन अन्तर्राष्ट्रिय विमानस्थल आधा घन्टा बन्द भएको छ ।

उडान सञ्चालन विभागका निर्देशक नरेन थापाका अनुसार बन्दका कारण दुई अन्तर्राष्ट्रिय जहाज अन्तै डाइभर्ट गर्नुपरेको थियो । त्यस्तै आधा दर्जन विमान आकाशमै होल्ड भएका थिए ।

विमानस्थलका अर्का निर्देशक विमलेश कर्णका अनुसार दसैंका बेला मासु तथा हाड जथाभावी फालिएकाले कोटेश्वर क्षेत्रमा चराको भीड देखिएको थियो । 'विमानस्थल बन्द भएपछि आबुधावीबाट आएको इत्तिहादको जहाज अवतरण नगरी लखनउ डाइभर्ट भयो । त्यस्तै कुन्मिङबाट आएको चाइना इस्टर्नको जहाज ढाका डाइभर्ट भयो,' कर्णले भने, 'होल्ड भएकाहरू विमानस्थल खुल्नासाथ अवतरण भए ।' अन्तर्राष्ट्रिय टर्मिनलका अनुसार डाइभर्ट भएका जहाज बेलुका ७ बजेपछि मात्र विमानस्थलमा अवतरण भएका हुन् ।

नागरिक उड्डयन प्राधिकरणका अनुसार त्रिभुवन विमानस्थलमा सन् १९९० यता ८१ पटक चरा ठोक्किइसकेका छन् । यसअघि मनहरा पुल नजिकै भएको सीता एयर दुर्घटनाको प्रारम्भिक कारण 'चरा ठोक्किनु' लाई बताइएको थियो । यस्ता घटनाले ३ दुर्घटना निम्त्याएको छ । सन् १९९६ अक्टोबरमा थाई एयरवेजको एयरबस, सन् २०१० को सेप्टेम्बर २ मा विमान बंगलादेशको डीसी-१० दुर्घटनामा परेको थियो । त्यसैले केही समययता प्राधिकरणले विमानस्थलमा चरा धपाउन एक निकाय नै गठन गरेको छ ।

त्रिभुवन विमानस्थल नजिक रहेको फोहोर वाग्मती र मनहरा खोला, खेतीपाती, रूखबिरुवा र मानव बस्तीका काण चराको आगमन बढी छ । विज्ञका अनुसार जहाज प्रतिघन्टा १ सय ५०  किलोमिटरको गतिमा उड्दा ३ केजीको चरा ठोक्किए त्यसले असर १ वर्गफिटमा १ हजार ८ सय किलो ह्याम्मरले हिर्काए बराबरको ठक्कर दिन्छ ।