पाल्पामा जीप दुर्घटना ४ को गयो ज्यान

कार्तिक ७ - पाल्पा- जिल्लाको चिदीपानी-३ भुटुकेभन्ज्याङ्मा बिहीबार दिउँसो भएको जीप दुघर्टनामा मृत्यु हुनेको संख्या ४ पुगेको छ । ११ जना घाईते भएका छन् ।

दुघर्टनामापरी बहादुरपुर, २ की ६३ बर्षीया भूमीसरा बारघरे, जल्पा, ९ की २६ बर्षीया ज्ञानीसरा सारु,  जल्पा, ९ कै ८६ वर्षीय बदलसिंह सारु र जल्पा, ७ की ५० वर्षीय चन्द्रबहादुर बारघरेको मृत्यु भएको प्रहरीले जनाएको छ । भूमीसरा, ज्ञानीसरा र बदलसिंहको घटनास्थलमै र चन्द्रबहादुरको तानसेनस्थित मिसन अस्पतालमा उपचारको क्रममा मृत्यू भएको हो । चन्द्रबहादुर जीपका मालिक हुन् ।

चिर्तुङ्धाराको भारतीय पेन्सन क्याम्प चिलाङ्दीबाट पूर्वको जल्पा गाविस जाँदै गर्दा लु. १ ज १२३० नम्बरको जीप दुघर्टनामा परेको जिल्ला प्रहरी प्रमुख स्थानेश्वर रेग्मीले बताए । दुघर्टनामा परी देवीनगरका धर्मराज कुँवर, जल्पाकी ममता कुँवर, सोही गाविसकै कृष्ण राना, शेरचन सारु, भीमकुमारी सारु, बहादुरपुरकी उमीसरा मगर, हुमिनका बसन्त रसाईली, बहादुरपुरकै टेकबहादुर ढेगा, हुमिनकी देवी कुमारी राना, बहादुरपुरका नरबहादुर बारघरे, चिदीपानीका मनोहर पुरी घाईते भएका छन् । घाईते सवैलाई तानसेनस्थित मिसन अस्पतालमा उपचारका लागि ल्याइएको छ । दुघर्टनाग्रस्त जीप सडकदेखि सय मिटरतल खसेको स्थानीयले बताए । दुघर्टनाको कारण नखुलेको प्रहरीले जनाएको छ ।