पहिलो संबिधानसभा असफल नभएको राष्ट्रपतिको भनाइ

काठमाडौ, कार्तिक ४ - राष्ट्रपति रामवरण यादवले पहिलो संविधानसभा असफल नभएको दाबी गरेका छन् । उनले संविधानसभाको चार वर्षे कार्यकालमा महत्वपूर्ण काम भएको उल्लेख गरे ।

'पहिलो संविधानसभा पूर्णरुपमा फेलियर भएको होइन,' गैरआवासीय नेपाली संघ -एनआरएनए)को विश्व सम्मेलनलाई सोमबार राजधानीमा उदघाटन गर्दै राष्ट्रपतिले भने, 'पहिलो संविधानसभाले धेरै महत्वपूर्ण काम पनि गरेका छन् ।'

राष्ट्रपति यादवले परिवर्तनलाई संस्थागत गर्दै संविधानसभाको पहिलो बैठकले मुलुकमा संघीय लोकतान्त्रिक गणतन्त्र घोषणा गरेको बताए । 'यसै संविधानसभाबाट चार-चारवटा सरकार बने,' ब्यङ्ग्य मिसाउँदै उनले भने, 'तिनै सरकारले लडाकु तथा हतियार व्यवस्थापनका काम गरेर सशस्त्र द्वन्द्व समापनको औपचारिक घोषणा गरेको छ ।'

राष्ट्रपतिले पहिलो संविधानसभाले पारिवारिक राजसंस्थाको अन्त्य गरि राष्ट्राध्यक्षमा जनताको छोरालाई निर्वाचित गर्नेजस्ता धेरै काम गरेको बताए । 'धेरै उपलब्धी भए,' उनले भने, 'मुल कुरा संविधान बन्न सकेन ।' उनले आगामी महिना हुने दोस्रो संविधानसभाले मुलुकलाई नयाँ संविधान दिने विश्वास व्यक्त गरे ।

एनआरएनए विश्व सम्मेलनलाई सम्बोधन गर्दै परराष्ट्रमन्त्री माधवप्रसाद घिमिरेले एनआरएले आर्थिक-कुटनीतिक सहयोगीको भूमिका खेल्ने विश्वास व्यक्त गरे । उनले सरकारले एनआरएनसँग मिलेर काम गर्न चाहेको उल्लेख गर्दै नेपाललाई समृद्ध बनाउन पहल गर्न आग्रह गरे ।

एनआरएनए संस्थापक उपेन्द्र महतोले मातृभूमिलाई आफैंले विकास नगरेसम्म विदेशी पनि नआउने बताए । उनले नेपालमा धेरै सम्भावना रहेको उल्लेख गर्दै राजनीतिक स्थिरता कायमका लागि सचेत हुन राजनीतिक नेतृत्वलाई आग्रह गरे ।

एनआरएका निवर्तमान अध्यक्ष जीवा लामिछानेले लगानीको वातावरण बनाउन सरकारले गरेका विभिन्न निर्णयले उत्साहित तुल्याएको बताउँदै दोहोरो नागरिकतालगायतका विषयमा अब बन्ने संविधानले सम्बोधन गर्ने विश्वास व्यक्त गरे ।

नेपाल उद्योग वाणिज्य महासंघका अध्यक्ष सुरज वैद्यले नेपालमा लगानीका लागि एनआरएनले पुर्‍याएको सहयोगप्रति धन्यवाद व्यक्त गरे ।

विश्व सम्मेलनमा सोमबार र मंगलबार विभिन्न कार्यपत्रमाथि छलफल हुने कार्यक्रम छ