सलमानलाई बेलायतको किक

काठमाडौ, श्रावण २१ - केही साताअघि नायक आर्यन सिग्देललाई अमेरिकाले भिसा दिएन । पब्लिक फिगरलाई भिसा दिने मामिलामा समेत अनुदार अमेरिकाबाहेक आर्यन अन्य युरोपेली मुलुकको भिसा पाउन पनि अनलक्की बन्दै आएका छन् ।

अमेरिका पुगेर एक फिल्मका लागि साइन गर्ने उनको भ्रमणको उद्देश्य भिसाकै कारण सम्भव भएन । यी सबै कुरा आर्यनले गुपचुपमै राखे । तर यतिबेला बलिउड नायक सलमान खानले पनि भिसा नपाएपछि भने ठूलै हल्ला भएको छ । सलमानलाई बेलायतले भिसा नदिँदा उनको आगामी फिल्म 'किक' को सुटिङ प्रभावित हुने देखिएको छ । खासमा उनी सोही फिल्मका लागि जान लागेका थिए ।

राजस्थानमा मृग र हरिण अनाधिकृत रूपमा मारेको अभियोग खेपिरहेका सलमानलाई त्यसैकारण भिसा नदिएको हुन सक्ने अनुमान गरिएको छ । उक्त मुद्दामा अदालतले १५ दिनपछि सुनुवाइ गर्दै छ ।

साजिद नाडियावाला निर्देशित 'किक' को गत सातादेखि स्कटल्यान्डमा रणदीप होडाको सिनको सुटिङ चलिरहेको थियो भने आगामी साता सलमानको बेलायतमा हुँदै थियो । एकपटक अस्वीकार गरिसके पनि सलमानले फेरि प्रोसेस गर्ने बताइएको छ ।

सलमानले सन् १९९८ हरिण काण्ड मच्चाएपछि केही समय जेलमा हावासमेत खाइसकेका छन् । राजस्थानको उच्च न्यायालयमा कारबाही निर्णयविरुद्ध अपिल गरेको मुद्दा विचाराधीन भएकै बेला बेलायतले भिसा दिन अस्वीकार गरेको हुने ठानिएको छ ।

त्यसो त ४७ वर्षीय सल्लुले सन् २००२ मा सडक दुर्घटनामा एकको ज्यान लिएर भागेको अभियोग पनि खेपिरहेका छन् । साजिदले भने सलमानले भिसा पाउन नसक्नुलाई 'टेक्निकल इरर' भनी टिप्पणी गरेका छन् ।

हालै मात्र मोबाइल सर्चिङमा सर्वाधिक खोजीको सूचीमा एक नम्बरमा परेका सलमान खानलाई बेलायतले भिसा नदिनुको कारण भने खुलाएको छैन । सलमान एक नम्बरमा आएको सूचीमा गायिका टेलर स्विफ्ट आठौं नम्बरमा छिन् भने उनकै पूर्वप्रेमिका कटि्रना कैफ दोस्रोमा परेकी छन् ।