तीन दिनदेखि अछाम अन्धकार

नहर भत्केर विद्युत् आपूर्ति अवरुद्ध भएपछि अछाम जिल्ला शुक्रबारदेखि अन्धकारमय बनेको छ । सदरमुकाम मंगलसैन, व्यापारिक केन्द्र साफेबगरलगायत १७ गाविस बिजुलीविहीन भएका हुन् ।

अछामका प्रमुख जिल्ला अधिकारी गणेश भट्टराईका अनुसार बिजुली नहुँदा अस्पताल, सरकारी कार्यालय, साना उद्योग, प्रेसलगायत क्षेत्र प्रभावित भएका छन् । 'अस्पतालको आकस्मिक कक्ष अनिश्चितकालीन बन्द हुने अवस्थामा पुगेको छ,' प्रमुख जिल्ला अधिकारी भट्टराईले कान्तिपुरसँग भने, 'जिल्लाका तीनवटा एफएम, दैनिक पत्रिकाहरू, निर्वाचन कार्यालयका गतिविधिलगायत सबै ठप्प हुन पुगेको छ, पूरै जिल्ला अन्धकार छ ।'

'हामी त बर्बाद हुने भयौं, समाचार लेख्न र पत्रिका प्रकाशन नै लामो समय बन्द हुनेभो,' खप्तड दैनिकका सम्पादक शिवराज खत्रीले भने, 'सबै क्षेत्र र सबै काम ठप्प हुन पुगेको छ, पूरै जिल्लावासी चिन्तित छौं ।'

२०५२ देखि सञ्चालनमा आएको ४ किलोवाट क्षमताको कैलाशखोला साना जलविद्युत् आयोजनाको पावरहाउसमा पानी लग्न बनाइएको नहरको ३० मिटर लामो भाग भत्केपछि विद्युत् उत्पादन र आपूर्ति रोकिएको हो ।

स्थिति गम्भीर बनेपछि आइतबार अछाममा बसेको सर्वपक्षीय भेलाले तत्काल नहर मर्मत सम्भव नभए पनि डोटीबाट विस्तार हुँदै गरेको केन्द्रीय प्रसारण लाइनलाई यथाशीघ्र जोड्न सरकारसँग माग गरेको छ । विद्युत् नहुँदा हरेक क्षेत्र ठप्प हुन गई पूरै जिल्लाको जनजीवन नै प्रभावित भएको ठहर भेलाले गरेको छ । विद्युत् सञ्चालनका लागि यथाशीघ्र पहल नभए आसन्न निर्वाचनसमेत अवरुद्ध हुने निष्कर्ष भेलाले निकालेको छ ।

घटनाको भोलिपल्ट शनिबार सरोकारवालाको टोलीले स्थलगत अध्ययन गरेको थियो । नहर पुनर्निर्माणका लागि ४०/४५ लाख लाग्ने प्राविधिकले प्रारम्भिक इस्टिमेट गरेका छन् । 'तल कैलाशखोला र माथि भीर रहेकाले नहर पुनर्निर्माणमा चुनौती छ,' प्रजिअ भट्टराईले भने ।

वर्षामा बालुवाले नहरको क्यानल भरिने कारण यसअघि पनि पटक-पटक विद्युत् आपूर्तिमा समस्या हुँदै आए पनि मर्मतमा सम्बन्धित निकायले वास्ता नगरेको गुनासो स्थानीय शंकर तिमिल्सेनाले गरे ।

 source ekantipur.com