दाहालले भने संबिधान नबन्नुको जिम्मेवारी लिन्छु

डडेलधुरा , कार्तिक ३ - एमाओवादी अध्यक्ष पुष्पकमल दहालले बिगत संविधानसभाले संविधान बनाउन नसक्नुको नैतिक जिम्मेवारी आफूले र आफ्नो पार्टीले लिने बताएका छन् ।

'ठूलो पार्टी र ठूलो पार्टीको नेताका हैसियतले संविधान बन्न नसक्नुको नैतिक जिम्मेवारी लिन्छु,' डडेलधुरा बसपार्कमा आयोजित सभालाई सम्बोधन गर्दै प्रचण्डले भने, 'अन्य दलले अग्रगामी निकासका लागि सहमत हुन नसक्दा संविधान बन्न नसकेको हो ।' पुरानै ढर्राको शासन व्यवस्था चाहनेहरुका कारण संविधान नबनेको उनले दावी गरे । 'सहमतिका लागि बढी समय बर्बाद गरेर गल्ती भएको हो,' उनले भने,  'असहमत विषयलाई निर्वाचनबाट नटुङ्गयाएर गल्ती भएको हो ।'

यस पटक जनताले साथ दिए छ महिनाभित्रै संबिधान बनाएर देखाउने उनले दावी गरे । ६ वर्षमा संविधान नबनाउनेले अव के बनाउलान् भन्ने भ्रम हटाएर सबै निर्वाचनमा लाग्नुपर्नेमा प्रचण्डले जोड दिए ।  'अब ६ महिना सहमतिको प्रयास गरिनेछ,' उनले संविधान बन्नेमा विश्वस्त तुल्याउँदै भने, 'सहमति नभए निर्वाचनमा गएर पनि एक बर्षभित्र संविधान जारी हुन्छ ।'

सुदूरपश्चिमको विकासलाई आफ्नो पार्टीले पहिलो प्राथमिकतामा राखेको बताउँदै पूर्व प्रधानमन्त्री दाहालले आफ्नै पालामा सुदूरपश्चिमका लागि विशेष विकास प्याकेज ल्याउने प्रयास गरेको बताए । 'पार्टीले कर्णाली र सुदूरपश्चिमलाई प्राथमिकतामा राखेर नीति निर्माण तहमा काम गरिहेको छ,' दाहालले भने, 'गत निर्वाचन जस्तै यस पटक सुदूरपश्चिमकै मतले माओवादी सत्तामा जाने निश्चित रहेको छ ।'

करिव ३५ मिनेट लामो भाषणको क्रममा दाहालले पूर्वप्रधानमन्त्री शेरबहादुर देउवाका बिषयमा एक शब्द पनि बोलेनन् । अखण्ड सुदूरपश्चिम र पश्चिमसेती जस्ता चर्चित चुनावी मुद्दाका विषयमा पनि दाहालले केही बोलेनन् ।

कार्यक्रममा कांग्रेसबाट माओवादी प्रवेश गरेका पूर्वमन्त्री खेमराज मायालुले एकीकृत माओवादीले मात्र संविधान जारी गर्न सक्ने बताए । पूर्वमन्त्री लेखराज भट्ट सहितका माओवादी नेताहरुले चुनावीसभालाई सम्बोधन गरेका थिए ।