एयर डाइनेस्टीको हेलिकोप्टर दुर्घटना

१० असोज, काठमाडौं । सोलुखुम्बुको लुक्ला विमानस्थलमा बिहीबार बिहान एयर डाइनेस्टीको हेलिकोप्टर दुर्घटना भएको छ । दुर्घटनामा ३ जना घाइते भएका छन् । उनीहरु मध्ये एकको अवस्था गम्भीर छ ।

काठमाडौंबाट लुक्लाका लागि उडेको हेलिकोप्टर अवतरणका क्रममा दुर्घटना भएको हो । अवतरणका क्रममा हेलिकोप्टरको पछाडिको पंखा विमानस्थलको वरपर लगाइएको तारको जालीमा छोएपछि दुर्घटना भएको जिल्ला प्रहरी कार्यालय सोलुखुम्बुले जनाएको छ ।

दुर्घटनामा हेलिकोप्टरका क्याप्टेन दावा गेलु शेर्पा गम्भीर घाइते भएका छन् । उनलाई उपचारका लागि एयर डाइनेस्टीको अर्को हेलिकोप्टर काठमाडौं ल्याइसकेको छ । लाक्पा सोनाम शेर्पा र उनकी श्रीमती अनिता शेर्पा सामान्य घाइते भएका छन् । हेलिकोप्टरमा चालक दलका सदस्यसहित ४ जना थिए ।